Comments Add Comment

एमाले झगडामा कहाँ छन् वामदेव ?

गौतम निकट नेता पराजुली भन्छन् – वार्ताको सहजीकरण हामीले गरेका हौँ
तत्कालीन नेपाल कम्युनिष्ट पार्टी (नेकपा) राजनीतिक रुपमा विभाजित हुँदा उपाध्यक्ष रहेका वामदेव गौतम पार्टी मिलाउने अभियानमा लागे ।

प्रचण्ड–नेपाल र ओली पक्षीय समूहका गुटगत कार्यक्रममा नजाने उद्घोष गरेका गौतमले पार्टी एकता राष्ट्रिय अभियानको घोषणा गरे ।

फागुन २३ गतेको सर्वोच्च अदालतको फैसलापछि नेकपा एमाले र नेकपा माओवादी केन्द्र साविकको अवस्थामा फर्किए । तर, विवाद एमालेमा कायम नै रह्यो । एमालेमा ओली र खनाल–नेपाल समूहगत गतिविधि जारी नै छ ।

गौतम हाल पनि एकता अभियानमा नै रहेको उनको सचिवालयले जानकारी दिएको छ । तर उनले यो विषयमा भने औपचारिक धारणा सार्वजनिक गरेका छैनन् ।

गौतमले दुई दिनअघि उपप्रधानमन्त्रीसमेत रहेका राजेन्द्र महतोले दिएको अभिव्यक्तिको आलोचना गर्दै प्रधानमन्त्री केपी शर्मा ओली यसमा अनविज्ञ रहन नमिल्ने धारणा राखेका थिए ।
तर गौतम पार्टीभित्र एकताको पक्षमा उभिएको र दुवै पक्षलाई वार्ताको दबाब दिने भूमिकामा रहेको उनी निकटस्थहरु बताउँछन् ।

पार्टीका अध्यक्ष ओलीले गरेका पछिल्ला निर्णय फिर्ता लिनुपर्ने अडानमा नै रहेको उनको सचिवालयले जानकारी दियो ।

केही समयअघि गौतमले खनाल–नेपाल समूहले छुट्टै पार्टी गठन गरे र आफू उक्त पार्टीमा सामेल हुने घोषणा गरेका थिए ।

त्यसयता उनले पार्टीको विषयमा औपचारिक धारणा सार्वजनिक गरेका छैनन् ।

वामदेव निकट नेता हरि पराजुलीका अनुसार यतिबेला वामदेव ‘पर्ख र हेर’को नीतिमा छन् । ओली पक्ष र नेता नेपाल पक्षका नेताहरुबीच भइरहेको अनौपचारिक संवादको निष्कर्षको पर्खाइमा पूर्वमन्त्री समेत रहेका पराजुलीले बताए । खनाल–नेपाल समूहबाट नेताहरु घनश्याम भुसाल, गोकर्ण विष्ट ,सुरेन्द्र पाण्डे र ओली पक्षीय नेताहरुबीच अनौपचारिक रुपमा केही अघि वार्ता भएको थियो ।

सोही वार्तापछि प्रधानमन्त्रीसमेत रहेका अध्यक्ष ओलीले आइतबार बेलुका एक वक्तव्य जारी गर्दै प्रतिपक्ष दलका नेता शेरबहादुर देउवालाई समर्थन गर्ने गरी गरिएको हस्ताक्षर फिर्ता लिएमा आफू जेठ २ को अवस्थामा फर्किन तयार रहेको बताएका छन् ।
तर यसलाई झलनाथ खनाल र माधवकुमार नेपाल पक्षका नेताहरुले भने ‘षडयन्त्र’ भनेका छन् ।

तर सोही समूहभित्रका कतिपय नेताहरुले भने ओलीको कदमको स्वागत गरेका छन् । यो समूहले आज आफ्नो आधिकारिक धारणा सार्वजनिक गर्ने तयारी गरेको छ ।

वामदेव समूहले भने दुवै पक्षको वार्ताको सहजीकरण आफूहरुले गरेको दाबी गर्दै आएको छ ।

“हामी पर्ख र हेरको अवस्थामा छौं । घनश्याम, योगेशजीहरुले वार्ता गरिरहनुभएको छ । हेरौं निष्कर्ष के हुन्छ । वार्ताको सहजीकरण हामीले नै गरेका हौं । औपचारिक रुपमा वार्ता भयो भनेर एउटा विज्ञप्ति निकाल्ने कुरा थियो । तर, केपी कामरेडले विज्ञप्ति निकाल्नु भएन । उहाँले अनौपचारिक रुपमा वार्तामा बोलाउनुभयो,” पराजुली भन्छन् ।

वार्ताको निष्कर्षपछि के गर्ने भन्ने निर्णयमा पुग्ने उनले बताए ।

२०७५ जेठ २ को आसपासमा फर्कनको लागि १० सदस्यीय कार्यदल गठन भएको थियो । तर, उक्त कार्यदल भंग भएको दुवै पक्षीय नेताहरु बताउछन् ।

एमालेको खनाल–नेपाल समूहका नेताहरुले नेता माधवकुमार नेपाललाई पार्टी विभाजनका लागि दबाब दिइरहेका छन् ।

पार्टीअध्यक्ष केपी शर्मा ओलीसँग एकता सम्भव नभएको भन्दै छिट्टै निर्णय लिन तल्ला तहका नेताहरुले दबाब बढाएका छन् ।

तर, सर्वोच्च अदातलको फैसलाअघि विभाजन नगर्ने निष्कर्षमा उक्त समूह पुगेको छ । तर, पार्टी नफुटाउन आग्रह गर्ने पराजुली बताउँछन् ।

उता, ओली पक्ष पार्टी एकताका लागि अन्तिम समयसम्म प्रयत्न गर्ने बताइरहेका छन् । स्थायी कमिटीको बैठक तोकिए पनि पार्टी एकताका लागि भन्दै बैठक अनिश्चित कालसम्मका लागि स्थगन भएको छ ।

प्रधानमन्त्री ओलीले जेठ २१ गते जनता समाजवादी पार्टीका अध्यक्ष महन्थ ठाकुर पक्ष समेटेर मन्त्रिपरिषद् विस्तार गरेका छन् ।

केही महत्वपूर्ण मन्त्रालय ओली आफैँले राखेका छन् । वामदेव निकट अर्का एक नेता बाँकी रहेका मन्त्रालय छिट्टै पूर्ति हुने या नहुने भन्ने विषयले वार्ता कहाँ पुगेको भन्ने अनुमान गर्न सकिने बताउँछन् ।

“बाँकी मन्त्रालयमा मन्त्री फूल भए भने वार्ता कता गइरहेको छ भन्ने कुरा स्पष्ट हुन्छ । तत्काल फूल भएनन् भने ठाउँ रहिरहन्छ,” ती नेताको भनाइ छ ।

यो खबर पढेर तपाईलाई कस्तो महसुस भयो ?

ट्रेन्डिङ

सम्बन्धित खवर

Advertisment

छुटाउनुभयो कि? सबै